لمر مومند
ټورنټو مېشتو افغانانو په هند کې د کرکټ د روان نړېوال جام په لوبو کې د پاکستان پرخلاف د افغانستان د کرکټ د ملي لوبډلې بریا په اتڼ، جشن او خوشحالۍ ونمانځله.
دا په داسې حال کې ده، چې د افغانستان د کرکټ ملي لوبډلې د یکشنبې په ورځ په هند کې د کرکټ د نړېوال جام په ګروپي لوبو کې پاکستانۍ لوبډلې ته په ۸ ویکټو ماتې ورکړه . دا لومړی ځل دی، چې افغانستان د کرکټ په نړېوال جام کې پاکستان ته ماتې ورکوي. دا د کرکټ په روان نړېوال جام کې د افغانستان دویمه بریا وه، تر دې مخکې ملي لوبډلې د انګلستان لوبډلې ته هم ماتې ورکړې وه.
ټورنټو مېشتنو افغانانو د خپلې لوبډلې بریا په لېونۍ مینې ونمانځله. د دوشنبې په ورځ ماښام ګڼ شمېر افغانان د ټورنټو په ټورنکلیف ښارګوتي کې له ملي بېرغونو سره راغونډ شوي ول، اټنونه و نڅاګانې یې کولې او د خوشحالۍ دغه ورځ یې په ولوله انګیزه توګه نمانځله.
افغانان چې له کرکټ او له خبلې ملي لوبډلې سره بې کچه مینه لري، خوشحاله ول چې لوبډلې یې په نړېوال جام کې دویمه لوبه وګټله او د پاکستان د کرکټ لوبډلې ته یې – چې تل یې افغان لوبډلې ته په ټیټ
ه سترګه کتلي – په لوړ توپیر ماتې ورکړه.
په ټورنټو کې د بریا ددغه جشن مراسم په دغه ښار کې د افغان د ټولنیزو خدمتونو مرکز ANSS بنسټ په تابیا جوړه شوې وه، چې ددغه بنسټ فعالو غړیو پکې هم په جوش و خروش برخه اخیستې وه او د خپلې لوبډلې په بریا یې اتڼونه و نڅاګانې کولې او د خوښۍ اوښکې یې تویولې.
افغان ملي لوبډله تر دې مخکې هم څو ځله له پاکستانۍ لوبډلې سره په یو شمېر ټورنمنټونو کې مخامخ شوې وه، چې څو ځله یې لوبه د ګټنې تر بریده رسولې وه، خو له بده مرغه نه وو توانېدلي، چې لوبه وګټي.
که څه هم په لوبه کې ګټل او باېلل نورمال خبره ده، خو د لوبو تر ګټلو وروسته د پاکستانۍ لوبډلې د لوبغاړو پېغور امېزه چلند د افغان ولس زړونه خفه کول او په دې ارمان وو، چې لوبډله یې کله په یوه مهم نړېوال ټورنمنټ کې پاکستان ته ماتې ورکړي؟ همدا وو، چې په نړېوال جام کې د افغان لوبډلې تر بریا وروسته افغان ولس دغه بریا د اختر د خوشحالۍ په څېر په ولوله انګېزه توګه ونمانځله.
د افغانستان د کرکټ ملي لوبډله، چې پر ډېرو ستغو و سپورو لارو تر سفر وروسته دغه مقام ته رسېدلې، په داسې حال کې د افغانانو پر شونډو موسکا وېشي، چې
د وطن نامساعدو شراېطو د افغانانو له شونډو موسکا و له سترګو خوبونه تښتولي دي.
په دغو نامساعدو و خفه کوونکیو شرایطو کې د کرکټ د ملي لوبډلې لوبغاړي یواځیني هغه اتلان دي، چې پر افغان ولس خوښي وېشي او پر نړېوال سټیج د افغانستان درې رنګه ملي بېرغ او ملي سرود ژوندی ساتي. همدا لامل دی، چې افغان ولس هم له خپلو اتلانو سره له حده زیاته مینه لري او درناوی یې کوي.
د کرکټ د نړېوالو مبصرینو په اند، افغان لوبډله دا مهال په هغه پوزیشن کې ده، چې د کرکټ د نړۍ پیاوړیو لو
بډلو ته سرخوږی جوړولای شي، چې د بېلګې په توګه د افغان لوبډلې له خوا د کرکټ د دفاعي اتلې لوبډلې انګلستان
ته په لوړ توپیر ماتې ورکول یادوي.
په دې هیله، چې زموږ ملي لوبډله په دغه نړېوال جام کېپخپلو پاتې لوبو کې هم ښه کارګردګي وښيي او د یو څو نورو لوبو په ګټلو د نړېوال جام دویم پړاو ته هم لار ومومي.
په همدې هیله.
